နွားရိုင်းသွင်းချိန်နှင့်ဂငယ်ကွေ့စစ်တမ်း(အပိုင်း၂)



(မင်းဒင် ရေးသည်။)

(၄) အမေရိကန်၏မဟာဗျူဟာအရ အနောက်အုပ်စုဝင်နိုင်ငံများမြန်မာနိုင်ငံအတွင်းသို့ အဆောတလျင်ခြေဦးလှည့်ခဲ့လေသလော။
အမေရိကန်ရုရှစစ်အေးကာလအပြီးတွင် အမေရိကန်သည် စိန်ခေါ်သူမဲ့နေသော ချန်ပီယံနှင့်တူနေခဲ့သည်။စင်စစ် စီးပွားရေး၊စစ်ရေး၊ နိုင်ငံရေးနယ်ပယ်များတွင် ပြည့်စုံကြွယ်ဝနေသော အင်အားကြီးနိုင်ငံတခုအဖို့ မိမိ၏အစွမ်းအစ လက်ရည်ကို အမြဲတစေ တက်နေစေရန် ယှဉ်ပြိုင်ထိုးသတ်ဖက် မရှိမဖြစ်လိုအပ်သည်။နှိုင်းရဓမ္မတရားအတိုင်း မိမိအဆင့်အခြေမည်သည့်အနေအထားကို ရောက်ရှိနေကြောင်း မသိခြင်းပင်လျှင် ထိုအင်အားကြီးနိုင်ငံအတွက် အန္တရာယ်များလှသည်။ထို့ကြောင့် မိမိအားယှဉ်ပြိုင်ထိုးသတ်လေ့ကျင့်ဖက်ဖြစ်နိုင် လောက်သည့် တရုတ်နိုင်ငံကို ကမ္ဘာ့စီးပွားရေးအဖွဲ့(WTO)သို့ ဝင်ရောက်ခွင့်ပြုနိုင်ရေးအတွက် ဦးဆောင်လုံးပန်းခဲ့သည်။

သို့နှင့်ဆယ်စုနှစ်တခုကျော်သည့်အခါ တရုတ်၏ ခြေလှမ်းကျဲကြီးများကြောင့် ကမ္ဘာ့စီးပွားရေးအဝန်းအဝိုင်းတွင် တရုတ်တို့တမဟုတ်ချင်း နေရာရလာခဲ့သည်။တပြိုင်တည်းလိုလိုပင် အာရှပစိဖိတ်ဒေသ၏ စီးပွားရေးစစ်ရေး၊ပုလဲကိုးသွယ်စီမံကိန်းကဲ့သို့ ဒေသတွင်းစိုးမိုးရေး အစီအစဉ်များ ဖြင့်မဟာဗျူဟာမြောက်ဖြန့်ကျက်ရန် စိုင်းပြင်းလာခဲ့ကြသည်။
တိုက်ဆိုင်စွာပင် ယင်းကာလသည် အနောက်နိုင်ငံများအဖို့ စီးပွားရေးကသောင်းကနင်းဖြစ်ကာ အနောက်၏အနာဂါတ်သည့် အရှေ့ဖြစ် လာပြီး အာရှပစိဖိတ်ဒေသသည် ကမ္ဘာနိုင်ငံရေးပထဝီတွင် အချက်အချာကျလာသည်။၂၀၀၉ခုနှစ်ကမ္ဘာ့စီးပွားရေး အကြပ်အတည်း ကြောင့်အနောက်အုပ်စုတို့ အရှေ့ဖက်သို့ ဦးတည်သည့် မဟာဗျူဟာတွင် တရုတ်သည် အကြီးအကျယ်စိန်ခေါ်မှုအဖြစ် ပေါ်လွင် လာသည်။ထို့ကြောင့် လွန်ခဲ့သောလေးနှစ်ဝန်းကျင်မှ အစပြု၍ သြစတေလျမှာ အမေရိကန်ရေတပ်ကို အခြေစိုက်လာသည်။

ကျောက်ဖြူကူမင်းရေနံပိုက်လိုင်းစီမံကိန်းမှသည် မြန်မာနိုင်ငံကို တရုတ်ပြည်မြောက်ပိုင်း၏ ပင်လယ်ထွက်ပေါက်အဖြစ် စစ်ရေးစီးပွားရေး အမြင်နှစ်ဘက်ဖြင့် မဟာဗျူဟာမြောက်ခြေလှမ်းများကို အနောက်အုပ်စုက ကြီးစွာသောသတိဖြင့် စောင့်ကြည့်နေခဲ့ဟန်ရှိသည်။
ယင်းအချိန်က မြန်မာ့ပြည်တွင်းရေးကို ပြန်လည်သုံးသပ်ကြည့်လျှင်ညောင်နှစ်ပင်ညီလာခံမှသည် လွှတ်တော်ဖွဲ့စည်းနိုင်သည့် ကာလအထိသို့ ရောက်ရှိလာသည့်အခါ များပြားလှသော နိုင်ငံတကာကြွေးမြီ များ၊ဘက်ပေါင်းစုံမှ ယိုယွင်းမှုများကြောင့် လှေခွက်ချည်း ကျန်နေသော အချိန်တွင် လွှတ်တော်သည် မည်သည့်အလုပ်မျှ လုပ်ရန်မရှိတော့ပဲ ၁၀၉/၁၁၀ အမည်ခံလွှတ်တော်အဆင့် ဖြစ်တော့ မည့်ဆဲဆဲအခြေအနေသို့ဆိုက်ရောက်နေခဲ့သည်။

၂၀၀၉ခုနှစ်ဧပြီလကဒေါ်အောင်ဆန်းစုကြည်၏နေအိမ်သို့ ယက်တောအမည်ရှိ အမေရိကန်နိုင်ငံသားတစ်ဦး ရေကူးဝင်ရောက်ခဲ့သည်ကို မှတ်မိကြမည် ထင်ပါသည်။ဂျွန်ယက်တောပြစ်ဒဏ်ချမှတ်ခံပြီးသည့်အချိန်၁၈။သြဂုတ်၂၀၀၉ရက်နေ့တွင် အမေရိကန်အထက်လွှတ်တော် အမတ် ဂျင်မ်ဝက်လာရောက်၍ ဗိုလ်ချုပ်မှူးကြီး ဟောင်းနှင့်နှစ်ကြိမ်တိုင်တိုင်တွေ့ဆုံညှိနှိုင်းကာ ယက်တောကို ခေါ်ထုတ်သွားခဲ့သည်။ ယက်တောကို လွှတ်ပေးခဲ့ခြင်းအတွက် အမေရိကန်သမ္မတအနေဖြင့် မြန်မာအစိုးရ၏လုပ်ရပ်ကို ကြိုဆိုခဲ့သည်။မြန်မာ့နိုင်ငံရေးအလှည့် အပြောင်းသည် မြန်မာ့နိုင်ငံရေးအရှုပ်ထွေးဆုးံကာလဖြစ်သည့်ဂျင်မ်ဝက် ယက်တောဇာတ်လမ်းဖြစ်ပေါ်ချိန်ဝန်းကျင်တွင် စတင်ခဲ့သည်ဟု တွေးတောနိုင်ဖွယ်ရှိသည်။

(၅) ဗိုလ်ချုပ်မှူးကြီးဟောင်းကျောချမ်းလောက်သည့် အာဏာရှင်တို့၏ဇာတ်သိမ်းများ
သူ့သဘောသူ့ဆောင်နေသော ကမ္ဘာ့သမိုင်းဇာတ်ခုံပေါ်ဝယ် အာဏာရှင်တို့သည် မရှုမလှနိဂုံးချုပ်ခဲ့ကြောင်း သမိုင်းမှတ်တ်ိုင်များက သက်သေခံလျက်ရှိနေသည်။၂၀၀၆ခုနှစ်မှာ အီရတ်သမ္မတဆက်ဒမ်ဟူစိန် ကြိုးစင်ပေါ်မှာ နေဝင်ခဲ့သည်။ ၂၀၀၈နာဂစ်ဖြစ်ရပ်ဆိုး သည်လည်း အဓိကတာဝန်ရှိသူဗိုလ်ချုပ်မှူးကြီးကိုခြောက်လှန့်နေသည် အိပ်မက်တစ္ဆေ ဖြစ်နေချိမ့်မည်။
၂၀၁၁ဇန်နဝါရီလတွင် တူနီးရှားနုိုင်ငံသား သာမန်ဈေးသည် အဘူအာဇီဇီအသက်နှင့်ရင်းနှီးခဲ့သော အာရပ်နွေဦးသည် အီဂျစ်သမ္မတ မူဘာရက်ကို ရာထူးမှပြုတ်ကျစေခဲ့သည်။ထိုမှသည် လစ်ဗျားနိုင်ငံကို အာဏာရှင်စံနစ်ဖြင့်ဆယ်စုနှစ်ပေါင်းများစွာ ထင်တိုင်းကြဲခဲ့သော
လစ်ဗျားခေါင်းဆောင် ကဒါဖီသည်လည်း မမြင်ရက်မရှုရက် အသေဆိုးဖြင့် အမိုက်ဇာတ်သိမ်းခဲ့ပြန်သည်။အဆိုပါ အိပ်မက်ဆိုးများ ကြောင့် ဗိုလ်ချုပ်မှူးကြီးဟောင်းအနေဖြင့် သူ့ဘဝကူးကောင်းစေမည့် အစီအမံတရပ်ကို တွေးတောကြံဆခဲ့မည်မှာသေချာလှသော အချက်တစ်ရပ်ဖြစ်၏။
ဤနေရာတွင်သတိချပ်ရန်မှာ အဆိုပါကာလသည် အမေရိကန်နှင့် အနောက်အုပ်စုများ အာရှပစိဖတ်ဒေသသို့ စစ်ရေးစီးပွားရေး အခန်း ကဏ္ဍများတွင် တဆင့်ချင်းလှမ်းနေရာမှ အရှိန်မြင့်ခြေလှမ်းကျဲလာချိန်နှင့် တိုက်ဆိုင်နေသည်။

(၅)စာရေးသူသာ ဗိုလ်ချုပ်မှူးကြီးဟောင်းဖြစ်ခဲ့သော်
အကယ်၍စာရေးသူသည် ဗိုလ်ချုပ်မှူးကြီးဟောင်းဖြစ်သည်ဆိုငြားအံ့။အတ္တကိုရှေ့တန်းတင်ခဲ့သော သမိုင်းကြောင်းမကောင်းသည့် ပုဂ္ဂိလ် တစ်ဦးအနေဖြင့် အောက်ပါအတိုင်း စဉ်းစားတွေးတောမိမည်ဖြစ်၏။

"မြန်မာပြည်ဒီမိုကရေစီရခြင်းမရခြင်းသည်ပဓာနမဟုတ်။ကိုယ်လွတ်ရုန်းနိုင်သည်အဓိကဖြစ်၏။သိက္ခာတရားကို မည်သို့မျှ အဖတ်ဆယ် နိုင်တော့မည့် အခြေအနေမဟုတ်။ဘဝကူးကောင်းရန်လိုသည်။မြန်မာတပြည်လုံးကို တရုတ်လက်တွင်းသို့ သိသိသာသာ လုံးလုံးလျား လျားထိုးအပ်ခဲ့ ပြန်ရင်လည်း အမျိုးသားရေးစိတ်ဓာတ်ပြင်းထန်သည့် မြန်မာပြည်သူအများစု၏ အုံကြွဆူပူမှုကြောင့် တိုင်းပြည်ပျက် ကိန်းဖြစ်မည်။ တိုင်းပြည်ပျက်သည်မှာ အရေးမကြီးလှသော်ငြား ထိုမတည်ငြိမ်သောအခြေအနေတွင် မိမိနှင့်ဆွေတော်ရှစ် သောာင်းမျိုး တော်ပေါင်းမှာ မျက်နှာငယ်စွာဖြင့်တရုတ်ပြည်သို့ခိုလှုံရမည်"

"ဇွတ်အတင်းအဓမ္မအတည်ပြုခဲ့သည့်နာဂစ်ဖွဲ့စည်းပုံအခြေခံဥပဒေအရ မသမာနည်းမျိုးစုံဖြင့် ကြံ့ဖွံ့ကိုအနိုင်ရစေကာ ပေါ်ပေါက်လာ သော လွှတ်တော်သည်လည်း လည်မျိုအထိနစ်နေသော နိုင်ငံတစ်ကာကြွေးမြီများကြောင့် ၁၀၉/၁၁၀လွှတ်တော်ဖြစ်နေမည်။ထိုအတိုင်း ရှေ့ခရီးဆက်လျှင် ရွှေဝါရောင်တော်လှန်ရေးတွင် အစိုးရဖိနှိပ်များအပေါ်ဂိတ်ဆုံးစိတ်ကုန်နေသည့်လူထုအနေဖြင့် သေမထူးနေမထူး ဇာတ်ခင်းလာနိုင်သည်။ထို့ကြောင့်မိမိအား အဆိုပါအကြပ်အတည်းများကို ထွက်ပေါက်ပေးနိုင်မည့် အင်အားကြီးဒီမိုကရေစီနိုင်ငံတစ်ခုခု ၏ ကျောထောက်နောက်ခံရခဲ့သော် ကောင်းလေစွ"

ဗိုလ်ချုပ်မှူးကြီးဟောင်း ထိုသို့စိတ်ကူးဖဲရိုက်နေစဉ်မှာပင် အထက်တွင်ဆိုခဲ့သော အမေရိကန်နှင့်အနောက်အုပ်စုတို့၏ အာရှပစိဖိတ်ဆိုင် ရာစစ်ရေးစီးပွားရေးမဟာဗျူဟာတစ်ရပ် ပေါ်ထွက်ခဲ့ရာ ယင်းအခြေအနေသည်ပင် ဗိုလ်ချုပ်မှူးကြီး၏ထိပ်တန်းလျှို့ဝှက်ကိုယ်စားလှယ် တော်အချို့နှင့် အနောက်အုပ်စုတို့ အမေရိကန်(သို့မဟုတ်)ကြားနိုင်ငံတစ်ခုခုတွင်နိုင်ငံရေးအပေးအယူဇာတ်လမ်းတစ်ခုကို ဖြစ်ပေါ် စေခဲ့သည်ဟု စာရေးသူ၏ စိတ်ကူးကိုရှေ့ဆက်မိသည်။

(၆) ဖြစ်နိုင်ချေရှိသော အပြန်အလှန်အပေးအယူများ
ဗိုလ်ချုပ်မှူးကြီးဟောင်း၏ အဓိကတောင်းဆိုချက်မှာ ဆယ်သက်စားမကုန်ဖြုန်းမကုန်သော စည်းစိမ်များဖြင့် နောက်ကြောင်းအေးစွာ အနားယူနိုင်ရန်ဖြစ်၏။နောက်ကြောင်းပြန်အာဏာသက်ရောက်၍ ကြိုးစင်မတက်ရရေးဖြစ်၏။ဒီမိုကရေစီပါးဝသော အနောက်အုပ်စုကား မီဒီယာလွတ်လပ်ခွင့်ကိုအခြေတည်ကာတဆင့်ချင်းပြောင်းလဲယူရမည့်လမ်းကြောင်းကိုသာရွေးချယ်ခဲ့၏။"လွတ်လပ်စွာပြောဆိုရေးသားထုတ်ဝေခွင့် ရှိသောနိုင်ငံတစ်ခုတွင် မည်သူပင်အုပ်စိုးပါစေ စိုးရိမ်ရန်အကြောင်းမရှိ"ဟူသောာအချက်ကို ကောင်းစွာ ကျေညက်နားလည် သည့် အနောက်အုပ်စုသည် မြန်မာပြည်၏မီဒီယာလွတ်လပ်ခွင့်ကိုဇောင်းပေးတောင်းဆိုခဲ့ဟန်ရှိသည်။ မီဒီယာကို ဝါဒဖြန့်ချိရေး သက်သက်သာ နားလည်အသုံးပြုခဲ့သော စစ်ဗိုလ်ချုပ်တို့ကလည်း ဤအချက်ကို လွယ်လွယ်ပင် သဘောတူ လိုက်လျောခဲ့ကြဟန်ရှိ သည်။

အဆိုပါဆွေးနွေးပွဲသည် နှစ်ဖက် အကြပ်အတည်းဖြစ်၍ အနောက်အုပ်စုဘက်မှ အတတ်နိုင်ဆုံးလိုက်လျောသလို ကိုယ့်ဝမ်းနာကိုယ် သာသိသော ဗိုလ်ချုပ်မှူးကြီးဟောင်းသည်လည်း မဆွတ်ခင်က ညွှတ်နေသည်ဟုခန့်မှန်းနိုင်သည်။
အမေရိကန်စီအိုင်အေအနေဖြင့် ဗိုလ်ချုပ်မှူးကြီးကို တရုတ်တို့၏ဗမာပြည်ကိုဝါးမျိုမည့်အကြံ တိကျခိုင်လုံသော ထိပ်တန်းလျှို့ဝှက်ဖဲ တစ်ချပ်ကိုလည်း ထုတ်ပြခဲ့ဟန်ရှိ၏။ကြက်ကိုလည်လိမ်သည်သို့ဗိုလ်ချုပ်မှူးကြီးအထွန့်မတက်နိုင်၊မငြင်းနိုင်သော တုပ်နှောင်မှု တစ်ရပ်ကို အသုံးပြုခဲ့ဖွယ်ရှိ ကြောင်း ထည့်သွင်းစဉ်းစားသင့်သည်။

တိုတိုဇာတ်ပေါင်းခဲ့သော် အဆိုပါဆွေးနွေးပွဲသည် နှစ်ဖက်စလုံးအတွက်အောင်မြင်သောဆွေးနွေးပွဲဖြစ်ခဲ့သည်။ဤသို့လျှင် စစ်အုပ်စုတွင်း မှ အလယ်အလတ်လမ်းစဉ်ရှိပြီး နိုင်ငံအရေးကို ကျွမ်းကျင်သောရုံးအုပ်ကြီးကဲ့သို့ ပျော့ပျောင်းညင်သာစွာ ကိုယ်တွယ်နိုင် မည်ဟု နှစ်ဖက် စလုံးမှလက်ခံသည့် ဒုတိယဗိုလ်ချုပ်ကြီးဟောင်းဦးသိန်းစိန်သည် သမ္မတဖြစ်လာသည်။ထိုမှသည် သမ္မတကြီး ဦးသိန်းစိန်သည် အမျိုးသားခေါင်းဆောင်ကြီးဗိုလ်ချုပ်အောင်ဆန်း၏ဓာတ်ပုံချိတ်ဆွဲထားသည့် သမ္မတရုံးခန်းသို့ လူထုခေါင်းဆောင်ဒေါ်အောင်ဆန်း စုကြည်ကို ထူးခြားစွာဖိတ်ခေါ်ကာ သတင်းအတိအကျမထုတ်ပြန်နိုင်သော နှစ်ကိုယ်ကြား ဆွေးနွေးညှိနှိုင်း သဘောတူညီ ချက်ဖြင့် အမျိုးသားဒီမိုကရေစီအဖွဲ့ချုပ်သည် ကြားဖြတ်ရွေးကောက်ပွဲဝင်ခဲ့သည်။နေရာအားလုံးနီးပါး အနိုင်ရခဲ့သည်။

ထိုမျှမက လက်ရှိကာလ မှာပင်ဒေါ်အောင်ဆန်းစုကြည်နှင့် သမ္မတကြီးဦးသိန်းစိန်တို့ ရံဖန်ရံခါ နှစ်ဦးတည်းသီးသန့်ဆွေးနွေးမှုများရှိသော်ငြား အသေးစိတ်ကိုမူ နှစ်ဖက်စလုံးမှထုတ်ပြန်ခြင်းမရှိချေ။ကြားဖြတ်ရွေးကောက်ပွဲတွင် ဒေါ်အောင်ဆန်းစုကြည်ပါဝင်လာခဲ့ခြင်းဖြင့် ၈၈မျိုးဆက်အပါအဝင် အခြားအတိုက်အခံအင်အားစုများ၊လမ်းမများပေါ်တက်၍ဆူပူအုံကြွမည့် အခြေအနေကိုရှောင်ကွင်းနိုင်ခဲ့သည်။အဆိုပါ ဖြစ်ရပ်တို့သည်ပင် မြန်မာ့နိုင်ငံရေးအကူးအပြောင်းသည် လျှို့ဝှက်နက်နဲလှသည့် မဟာဗျူဟာမြောက်အစီအမံကြီးတစ်ခု၏လမ်းညွှန်မြေပုံအတိုင်း ခရီးနှင် နေသည်ဟူသော အယူအဆကိုပံ့ပိုးလျက်ရှိသည်။

(ဆက်လက်ဖော်ပြပါမည်)


စာရေးဆရာ မင်းဒင် ၏  facebook စာမျက်နှာမှကူးယူဖော်ပြပါသည်။